Millätneñ yañadan tuu dastanı

2016nçı yılnıñ 15nçe iyül’ köne – millätneñ yañadan tuu dastanı

Millätneñ yañadan tuu dastanı

Ozaq yıllar buyı astırtın räweştä Törek qorallı köçlärenä ütep kergän “FETÖ” äğzaläre, xärbi boyırıq qısasınnan çığıp, 2016nçı yılnıñ 15nçe iyül’ comğa könne säğät kiçke tuğız tiräsendä xain tüntäreleş kereşüen başlata. Şuşı cinayätlärçä omtılış – ozaq yıllar buyı äzerlängän küp urtaqlı xalıqara proyekt bulıp, maqsatında iñ êlek Törkiyäneñ bäysezlege, İlbaşı Räcäp Tayyip Ärdoğan häm xökümät bula. Tüntäreleşneñ töp nığıtması bulıp başqala Änkarada urnaşqan Akıncılar hawa bazası bula. Xain tüntäreleş omtılışı Änkarada häm İstanbulda beryulı başlatıla.

Tüntäreleşçelär aldan äzerlägän tüntäreleş planı nigezendä İstanbulda Bosfor häm Fatih Soltan Mäxmät küperläre, İstanbul vilayät iminlek mödirlege, Atatörek hawa mäydanı (aêroportı), TRT teleradiokompaniyäse binaları kebek strategik urınnarnı maqsat itep ala. Änkarada isä Milli küzläw oyışması, Änkara vilayäte iminlek mödire, İminlek ğomum mödirlege, Gölbaşı poliśiya maxsus xäräkät citäkçelege, Aviaśiya departamentı, Maxsus köçlär citäkçelege, TRT ğomum mödirlege, Törkiyä Böyek Millät Mäclese, İlbaşı qolliyäse häm Ğomum ştabnı, operaśiya ütkärep, basıp alırğa tırışalar. Bu tübänçelekle omtılış waqıtında Törek qorallı köçläre inventarendäge oçqıç, tank häm personal transportın qullanırğa totına. Oçqıçlar häm boralaqlar, şähärlär östendä bik tübän oçış yasap, maqsatlarına bomba ırğıta, tanklar uramnardan aldına çıqqannarnı izep maqsatlarına taba baralar, personal transportı belän kritik urınnarğa xärbi uniforma kiygän “Fetöçı yulbasarlar” alıp barıla.

İstanbulda häm Änkarada TRT binaları basıp alınıp, üzen “İldä tınıçlıq şurası” dip tanıtqan tüntäreleşçe cinayätçel törkem äğzaläre äzerlägän belderge uqıtılırğa mäcbür itelä. Şul uq belderge ber ük waqıtta Ğomum ştabnıñ internet säxifäsenä dä urnaştırıla.

Tekstta Törek qorallı köçläreneñ citäkçelekne üz östenä aluı, böten ildä uramğa çığunıñ tıyıluı, komendant säğäteneñ iğlan itelüe häm böten media organnarınıñ bu beldergene aşığıç räweştä tapşıruı zarurlığı citkerelä. Annan soñ Gölbaşı poliśiya maxsus xäräkät, Törkiyä parlamentı, İlbaşı idaräse qolliyäse, TÜRKSAT, Änkara vilayäte iminlek binaları bombalana.

Bu yawçı qorallı törkem üzlärençä bar närsäne uylağan bula. Ämma onıtqan ber närsäläre bula, ul da bulsa Allahnın täqdire häm böyek törek milläteneñ köç-küäte häm batırlığı. Qor’än, azan, bayraq belän señderelgän tarix, milli üzañ häm iman törek milläteneñ xarakterı, xolqı ul. Ğadättän tış wazğiyätneñ buluın sizep alğan millätneñ qıyu häm qaharman balaları sośial’ media aşa oyışıp, täxärät alıp, täqbirlär äytä başlıyı. Soñınnan Premyer-ministr Binali Yıldırım: “Bu – ğaskärebez êçendäge keçkenä xain törkemneñ fetnäseder, layıq bulğan cäzanı alaçaqlar”, - dip belderü yasıy. Häm annan soñ manaralardan yañğırağan säla tawışları. Häm xain tüntäreleşneñ töp maqsatı – xörmätle Ärdoğannıñ ber televideniye kanalı aşa yasağan: “Şähär mäydannarına, hawa mäydannarına aşığığız, millätebezneñ östendä ber köçne tanımıybız”, - çaqıruı.

Ul qaranğı baş kütärüneñ, tübänçelekle fetnä omıtılışınıñ häm xain tozaqnıñ bozılğan, betkän mizgele şuşı bula. İlbaşı Ärdoğan xalıqqa uramğa çığığız häm qarşılıq kürsätegez çaqıruı belän öylärdän uramnarğa, mäydannarğa, xain qorallı cinayätçel törkem basıp alğan böten urınnarğa xalıq häm üzañ ağımnarı yünälä. Alınğan tähärät belän, inanılğan yöräk belän, tellärdä täqbir belän oçqıçqa, tankka, boralaqqa, çılbırlı xärbi texnikağa, pulyalarğa häm bombalarğa qarşı üz köçen kürsätte millätneñ qıyu balaları.

Tüntäreleşçelär qoralsız bularaq uramğa çıqqan xalıqqa ut aça, bomba ırğıta. İstanbul häm Änkara belän ber rättän böten Törkiyädä tüntäreleşkä qarşı protest häm qarşılıq kürsätü çaralarında ğaskäri, poliśiya häm tınıç xalıqtan 248 keşe şähit bula häm 1537 keşe xärbi qorallar belän yaralana.

Törkiyä 16nçı iyül’ şimbä könne uyanğan çaqta tüntäreleşçelärneñ birelüe, täslim buluı küreneşläre, qaharman millät balalarınıñ täslim itep alğan tanklar belän fotosürätkä töşülär, Akıncılar hawa bazasında totılğan komandirlarnıñ azat itelüe xäbärläre kilä başlıy. Kiçkä qalmıyça Törkiyä böten oyışmaların, uramnarın, kazarmaların häm xärbi berleklären şuşı watansız cinayätçelärdän çistartqan bula.

Ber millätneñ yañadan tuu dastanı ul 15nçe iyül’. Törek milläteneñ dönyağa Dardanel-Çanakkalä uzılmas diyep äyttertkäne kebek Törkiyä bülenmäs, millät ciñelmäs dip äyttertkän kön ul 15nçe iyül’. Ul könne böten balalarıbız yäş’ buldı, yäş’lärebez olığaydı.

Ul könne bayrağıbız kük yöze ide.

Sälâlarıbız – marşıbız ide.

Täqbirlär – parol’ ide.

Anadolunı tağın ber qat watan qıldıq şähitlärebez häm ğazıylärebez belän. Ul könne ber lider tiräsendä yaxşılıq häm ğadälät öçen cıyılunıñ bäräkäten häm ciñüen kürdek. Ul könne doşman ciñelde, bez üstek, zuraydıq. Ul könne yaña bäysezlek marşın ber keşeneñ tügel, ber millätneñ niçek itep yazuına şahit buldıq. Ul könne, qarşılıq kürsätep, ber-berebezgä nıq itep bäylänep, watannı, bayraqnı häm azannı daimi qılaçağıbıznı belep aldıq. Ul könne tağın ber märtäbä böyek millätneñ, böyek däwlätneñ niçek buluın dustıbızğa-doşmanıbızğa kürsättek.

Ul könne bez dönyağa dastan yazdıq!



Bäyläneşle xäbärlär