Malayziyä İzrail sportçıların ilgä kertmi

Xökümät Bötendön’ya paraolimpiyä yözü çempionatına İzrail sportçıların kertmäskä qarar birde

Malayziyä İzrail sportçıların ilgä kertmi

Malayziyä xökümäte üzendä uzaçaq 2019nçı yılğı Bötendön’ya paraolimpiyä yözü çempionatına İzrail sportçıların kertmäskä qarar birde. Alarnıñ xätta ilgä kerüläre tıyıldı.

Xökümät räise Maxatxir Möxämmät ministrlar kabinetı cıyılışınnan son şundıy belderü yasadı. Ul İzrail matbuğat çaralarında çıqqan süzlärneñ döres buluın tanıdı. Anda izraille sportçılarğa Malayziyägä kerü röxsäte birelmäwe söylänä.  

Maxatxir Möxämmät xökümätneñ bu qarardan çigenergä cıyınmawın äytte. “Ägär kilsälär, bu cinayät’ bulaçaq. Malayziyädän çempionat ütkärü xaqın tartıp alırğa teläsälär - tırışıp qarasınnar,”-dide ul.

Yäş’lär êşläre häm sport ministrı urınbasarı Stiven Sim Çe Keong isä süz İzrail turında barğanda, Malayziyäneñ torışı kisken bulacağın belderde. “Xökümät, Fälästin xalqına yasaluçı basımğa protest belderü öçen, bu mäs’älädäge nıqlığın saqlayaçaq,”-dide ul.

Malayziyädä Bötendön’ya paraolimpiyä yözü çempionatı 29nçı iyül’dä başlanaçaq häm 4nçe avgustqa qadär däwam itäçäk. Anda 70 ildän 600dän artıq sportçınıñ qatnaşuı kötelä.  



Bäyläneşle xäbärlär