Meñnärçä yıllıq mozaikada şalqan figurası

Törkiyädä tözeleş qazuları waqıtında 1nçe yäki 2nçe yöz’yıllıqqa qarawçı idän mozaikaları tabıldı

Meñnärçä yıllıq mozaikada şalqan figurası

Törkiyädä Osmaniyä töbägeneñ Kadirli rayonında tözeleş qazuları waqıtında 1nçe yäki 2nçe yöz’yıllıqqa qarawçı idän mozaikaları tabıldı. Älege cirlektä bina salınırğa tiyeş ide. Tabıldıqtan soñ urın saq astına alındı häm tözeleş êşçänlege tuqtatıldı. Noyabr’ ayında başlanğan arxeologik qazınular waqıtında mozaikalarnıñ bersendä şalqan raşeme kürende.  

Osmaniyä töbäge mädäniyät häm turizm idaräse başlığı Burxan Torun, jurnalistlarğa belderü yasap, Törkiyädä şalqan citeşterüneñ 70-80%ın täêmin itüçe Kadirli rayonında älege yäşelçä töreneñ mozaikalarda da tabıluınıñ ähämiyätle buluın belderde. Ul mozaikalarnıñ miladtan soñ 1nçe yäki 2nçe yöz’yılda Rim çorına qarawın belderde. “Monda Zeugma belän tiñdäş  mifologik personajlar belän oçraşabız. Kadirlineñ tarixın yaqtırtaçaq êşçänlek,”-dip söyläde ul.

Torun äytkänçä, Osmaniyä tiräsendäge qazınu êşçänlegendä täwge tapqır keşe figuralı mozaikalar tabılğan. “Monda tabılğan mozaikalar ul çordağı keşelärneñ yäşäyeşe belän bäyle mäğ’lümat birä. Mozaikalarnıñ bersendä ber şalqan belän koçağında körtlek häm qulında yözem bulğan keşe figurası bar. Bu Kadirli belän tiñläşterelüçe şalqannıñ töbäktä yaqınça 2 meñ yıl êlek tä citeşterelüen kürsätä. Monnan tış, mozaikalarda Kadirli üzägendä ul çor belän bäyle täwge yazma dokumentnı da taptıq,”-dip söyli wäqalätle zat.



Bäyläneşle xäbärlär