Tramp belän xatını arasında kiyerenkelek

AQŞ ilbaşı Donal’d Tramp häm xatını Melaniya Tramp arasında Lebron Djeyms belän bäyle kiyerenkelek tudı. Trampnıñ älege tanılğan basketbolçını mısqıllawçı Twitter yazmasınnan soñ Melaniya şul uq şäxesne maqtap belderü yasadı.

Barısı da sportçınıñ ber televideniye reportajınnan soñ başlandı. Lebron Djeyms anda ilbaşı Trampnıñ qotıplaştıruçı säyäsät alıp baruın häm ıruğçılarğa qıyulıq birüen äytte. Şunnan soñ Donal’d Tramp Twitter säxifäsennän basketbolçınıñ aqılına qağılışlı mısqıllı yazma urtaqlaştı. Anda ilbaşı interv’yu aluçınıñ da axmaq buluına törtterde. “Xätta Lebronnı üz fonında aqıllı itep kürsätte, ä monı yasaw cinel tügel,”-dide ul. Bu yazmadan berniçä säğat’ ütkännän soñ Melaniya Tramp süzçese artqılı Djeymsnıñ Ogayoda ber mäktäptäge êşçänlege xaqında cılı süzlär söyläde. Ul üzeneñ älege uqu yortın ziyarät itäçägen dä belderde.     

Tanılğan basketbolçı reportajında sportnıñ törle ıruğlardan bulğan keşelärne bergä cıyuın söyläde. “Miña aq tänle keşe belän täwge tapqır sport belän şöğıl’längändä duslaştım,”-dide ul.  Lebron Trampnıñ keşelärne ayıruın häm, xätta, bu êştä sportnı qullanuın äytte. Reportajnıñ däwamında ul ilbaşı säyäsäteneñ ıruğçılarnı ğayrätländerüen belderde. “Iruğçılıq härwaqıt bar ide. Ämma bu ilbaşı arqasında keşelär monı yäşermi başladı. Tup-turı yözeñä bärep äytä,”-dip söyläde ul.

Tramp Lebron Djeymsnıñ aqıl däräcäsen şöbhä astına quyğan yazmasın: “Min Mayknı östen küräm,”-dip tamamladı. Bu anıñ Maykl Djordanğa işarät itüe ide.  Ämma Djordan aña tügel, Lebronğa teläktäşlek kürsätte. “Min Lebron Djeymsnı yaqlıym. Cämğıyät’ öçen iskitkeç êşlär başqara,”-dide ul.