Êyfel manarası işeklären yaptı
Êyfel’ manarası xezmätkärläre êş taşlaw säbäple Parijnıñ iñ matur urınnarınnan berse inde ikençe kön yabıq
Franśiyäneñ simvolı Êyfel manarası, xezmätkärläreneñ êş taşlawı näticäsendä, işeklären yaptı. Çara kiçä kiçke säğat’lärdä başlanğan ide, anıñ äle bügen dä däwam itüen belderdelär.
Xezmätkärlärneñ êş taşlaw säbäbe - Êyfel’gä kilüçelärneñ çiktän tış küp buluı. Çönki biletlar internettan da, kerü işege yanında da satıla. Näticädä aldan satılğan häm kerü säğate bilgelängän biletlar belän kilüçelär bik ozın çirat xasil itä.
Êyfel manarası Franśiyädä Luvr müzeye häm Versal’ Sarayınnan soñ iñ küp keşe qabul itüçe öçençe urın. Uzğan yıl anı 6,2 million turist zıyarät itkän.
Manara här kön irtänge säğat’ 9dan tönge 1 tularğa 15 minutqa qadär kilüçelär öçen açıq. Soñğı çorda anda üzgäreşlär buldı. İnternettan bilet satıp aluçılarğa östenlek birä başladılar. Xätta manara liftlarınıñ ber büleme bari tik alar öçen êşli başladı.
Xezmätkärlär bu wäzğıyät’neñ êteşü-törteşü häm yığılularğa kiterüen belderde. Monnan tış, anda êşläwçelär belän turistlar arasında yış qına kiyerenkelek kilep çığa.
Bäyläneşle xäbärlär
2027nçe yılğı Awrupa uyınnarı İstanbulda uza
Awrupa Olimpiya komitetı başqarma şurası monı bertawıştan xupladı