"Sarı jiletlılar"nıñ taläpläre qarala başladı

Franśiyädä rizasızlıq kürsätüçelär üz digänenä ireşergä mömkin

"Sarı jiletlılar"nıñ taläpläre qarala başladı

Franśiyä parlamentı häm senatı “sarı jiletlılar”nıñ yağulıq salımnarın töşerü häm iq’tisadi şartlarnı yaxşırtu öçen oyıştırğan rizasızlıq çaraların urtağa salıp söyläşäçäk. İlbaşı idaräsennän belderülärençä, irtägä parlamentta, pänceşämbe könne senatta demonstraśiyälär belän bäyle utırışlar bulaçaq. Şulay uq, irtägä xökümät räise Êduard Filipp ta “sarı jiletlılar”nıñ ber delegaśiyäsen qabul itäçäk.

Monnan tış, ilneñ iq’tisad ministrı Bruno Le Mêr rizasızlıq kürsätüçelärneñ taläplären ütäw öçen salımnar häm däwlät xezmätläre çığımnarınıñ tiz arada kimetelüe kiräklegen söyläde. Ul matbuğat cıyılışında kürelergä mömkin çaralarnı atadı. Ministr “sarı jiletlılar”nıñ protestlarınıñ il iq’tisadına täêsireneñ köçle buluın, bik küp tarmaqlarnıñ älege wäzğıyät’tän zıyan kürüen belderde. Anıñ äytüençä, rizasızlıq çaraları näticäsendä taşu häm logistika şirkätläre 400 million yevrolıq zarar kürde, otel’lärdä urın ayırıp quyuçılar sanı 20%qa kimede. Xätta Reno häm Pejo maşinaların satuda da qıyınlıqlar tuğan.  

Xökümät räise Filipp, ilbaşı Êmmanuêl’ Makron quşuı buyınça, oppoziśiyä partiyäläreneñ liderları belän dä söyläşülär alıp bara. Aralarında çiktän tış uñşı Milli berlek partiyäse räise Marin Le Pên häm çiktän tış sulçı “Başın imäwçe Franśiyä xäräkäte” citäkçese Jan-Lyuk Melenxon da bar. Alar xökümätne, rizasızlıq çaralarında köç qullanuğa röxsät itep, “sarı jiletlılar”nıñ qanuniyäten izärgä tırışuında ğayepli.



Bäyläneşle xäbärlär