Meksikada êlekkege ilbaşı oçqıçı satuğa çığa

Yaña däwlät başlığı lyuks oçqıçlardan baş tarttı

meksika eski dv.bşk.nın ucagi1.jpg

Meksikada êlekkege ilbaşınıñ lyuks oçqıçı satıla. Bu 1nçe dekabr’dä ant itep wazıyfasına kereşkän yaña däwlät başlığı Andres Manuêl’ Lopes Obradornıñ berençe êşe buldı. “Rişwätçe säyäsätçelär qullanğan oçqıç häm boralaqlarnı satabız,”-dide ul. Obradornıñ bu belderüennän soñ finans ministrı Karlos Urzua, Boeing 787 Dreamliner oçqıçınıñ qarşında matbuğat cıyılışı ütkärep, anı satu qararınıñ tizdän iğ’lan iteläçägen söyläde. Jurnalistlarğa oçqıçnı töşerergä röxsät ittelär.

Ministr Urzua beldergänçä, 2012nçe yılda 218 million dollarğa alınğan bu oçqıçtan tış xökümät qullanğan tağın 60 oçqıç häm 70 boralaq ta satılaçaq.

Obrador saylaw kampaniyäse barışında uq zinnätle oçqıçnıñ satılacağın ışandırıp: “Satıp aluçığa oçqıçnı tantana belän şäxsän tapşıraçaqmın,”-digän ide.

Obrador başqa ber açıqlawında isä: “İlbaşı oçqıçına utırmayaçaqmın. Bu qadär fäqıyr’lek bulğan däwlättä ul lyuks oçqıçqa mensäm - oyatımnan berkemneñ dä yözenä qarıy almam,”-dide.


Etiketlar: lyuks oçqıç , Meksika

Bäyläneşle xäbärlär