İranğa sankśiyälärneñ ikençe êtabı

AQŞ ilbaşı Donal’d Tramp idaräse tarafınnan İranğa qarata sankśiyälärneñ ikençe êtabı ğamälgä kerde. Ul ênergetika, finans häm transport tarmaqlarına qağıla. Berençe êtap 7nçe avgustta ğamälgä kergän ide.

İkençe êtap 6 maddädän tora.  Başta İrannıñ port operatorları, sudnoçılıq häm köymä yasaw tarmaqları kilä. İkençe maddä neft’ belän bäyle êşçänlekne qolaçlıy. Ul älege ildän qara altın häm annan yasalğan produkśiyä satıp alırğa teläwçelärgä qarata xalıqara çikläwlär kertä. Sankśiyälärneñ tağın ber maqsatı - çit il finans şirkätläreneñ İran üzäk bankı häm başqa qayber finans oyışmaları belän xezmättäşlege.   5nçe häm 6nçı maddädä isä aradaşlıq häm iminiyätläşterü şirkätläre belän ênergetika tarmağına qarata çikläwlär urın ala.

Şul uq waqıtta, AQŞ qazna ministrı Stiven Mnuçin bügen ğamälgä kergän sankśiyälär qısasında İrannıñ tağın 700dän artıq keşese häm şirkäteneñ qara isemlekkä kerteläçägen belderde.  

AQŞ däwlät särqatibe Mayk Pompeo isä comğa könne yasağan belderüendä İrannan neft’ alunı azaytqan, ämma tuqtatmağan 8 ilgä waqıtlıça çığarma tanıyaçaqların häm älege däwlätlärneñ isemlegen 5nçe noyabr’dä iğ’lan itäçäklären belderde. Ul sankśiyälär nisbätennän Awrupa Berlegenä taşlama yasamayaçaqların assızıqladı.