Kreml’ Trampnı Awrupağa basım yasawda ğayepli

Rusiyä Kremle süzçese Dmitriy Peskov AQŞnı üzeneñ sıyıqlandırılğan gazın satu öçen Awrupağa basım yasawda ğayepläde. Süz Donal’d Trampnıñ Germaniyanı ênergetika mäydanında “Rusiyäneñ äsire” dip atawı xaqqında. Peskov Rusiyäneñ küptännän Awrupanıñ ênergetiqa iminlegenä öleş kertüen assızıqladı. “Ütkärgeçlär aşa kiterelgän tabiğıy gazdan da qurqınıçsızraq ênergetika çığanağı yuq,”-dide ul. “Tön’yaq ağım 2” belän Germaniyaneñ Rusiyägä tağın da bäyle xälgä kilüe turındağı tänqıyt’lärgä qarata Peskov: “Monı döres dip äytä almıybız, çönki ütkärgeçlär aşa tabiğıy gaz citkerü ber ilne genä bäyle xälgä kitermäs, ike däwlät tä urtaq şäkeldä bäylelek toyar. Bu isä totrıqlılıq häm törle mäydannarda urtaq mänfäğat’lär bulğan üseşne garantiyälär,”-dide.  

Süzçe Trampnıñ “Tön’yaq ağım 2” proyektı xaqındağı süzlärenä qarşılıq kürsätte. “Tön’yaq ağım” gazütkärgeçläreneñ ikese dä tulısınça kommerśiyä proyektı. Bu proyektlarğa höcümnärne ğadel bulmağan köndäşlekneñ kürsätkeçe bularaq bäyälibez. AQŞ üzeñen sıyıqlandırılğan gazın satu öçen Awrupağa basım yasıy”,-dip belderde ul.    

Tramp kiçä Brüssel’dä yasağan belderüendä Germaniyaneñ  Rusiyä belän neft’ häm tabiğıy gaz kileşüe tözüen “bötenläy kiräksez” bularaq bäyäläde. AQŞ ilbaşı: “Germaniya ênergetika öçen Rusiyägä zur summalar tüli. Bu säbäple ul Rusiyäneñ äsire,”-dip qatı bärelde. Germaniya 2016nçı yılda Rusiyädän 50 milliard kubometr  zäñgär yağulıq aldı häm ilneñ iñ zur kliyentı buldı.