Cämal Qaşıqçınıñ soñğı mäqaläse
Ul “Ğaräp dön’yasınıñ iñ nıq ixtıyacı bulğan närsä - süz irege” dip atala
Soğud Ğaräbstanı jurnalistı Cämal Qaşıqçınıñ Amerikada “Vaşington Post” öçen yazılğan soñğı mäqaläse basılıp çıqtı. Ul “Ğaräp dön’yasınıñ iñ nıq ixtıyacı bulğan närsä - süz irege” dip atala.
Qaşıqçı mäqaläsendä ğaräp dön’yasında xalıqlarnıñ citärlek däräcädä mäğ’lümat almawın yäisä yalğış mäğ’lümat birelüen assızıqlıy. Anın fikerençä, keşelär töbäkkä häm köndälek tormışlarına yoğıntı yasağan mäs’älälär turında süz äytä almıy, cämäğat’çelektä söyläşä almıy häm bu wäzğıyät’ üzgärergä cıyınmıy. Ul 2011nçe yılda başlanğan “ğaräp yazı” waqıtında xalıqnıñ ömet belän tulı buluın telgä ala. “Jurnalistlar, akademiklar häm xalıq üz illärendä yaqtı häm irekle ğaräp cämäğat’çelege kötä ide. Ämma bu ömetlär tiz arada çälpärämä kilde, xalıq tuplılıqları yä êlekkege xällärenä kire qayttı, yäisä tağın da qırıs şartlarda yäşi başladı,”-dip yaza Qaşıqçı. Ul üzeneñ dustı, jurnalist Salix äl-Şäxineñ Soğud Ğaräbstanına qarşı fikerläre öçen bernindi qanuni nigeze bulmağan kileş 5 yıl törmädä utıruın xäterlätte. Monnan tış, mäqalädä Misır xökümäteneñ “äl-Masru al Youm” gazetın çığarunı da üz qulına aluın häm jurnalistlarnıñ moña rizasızlıq kürsätmäwläre äytelä.
Qaşıqçı ğaräp dön’yasınıñ barı tik tışqı köçlär tarafınnan tügel, xakimiyät öçen köndäşlek itüçe êçke köçlär yulı belän barlıqqa kiterelgän üzenä kürä ber timer pärdä belän yözgä-yöz buluın söyli. Ul xalıqnıñ üz tawışın işetterü öçen platformağa ixtiyac toyuın äytte.
Cämal Qaşıqçı Soğud Ğaräbstanı reformaçıları öçen ähämiyätle bulğan “Al Watan” gazetına öleş kertte. Şul uq waqıtta ul “Vaşington Post” gazetına da mäqalälär yazdı. Jurnalist 2nçe oktyabr’ könne Soğud Ğaräbstanınıñ İstanbuldağı konsullığına kergännän soñ yuqqa çıqtı.