Yaña Zelandiyä tağın da kübräk qaçaq qabul itäçäk

Koaliśiyä xökümäte ilgä qabul itüçe migrantlar sanın här yıl 1 meñ keşedän 1 meñ 500gä citkerü qararı çığardı

Yaña Zelandiyä tağın da kübräk qaçaq qabul itäçäk

Yaña Zelandiyä här yıl 500gä artığraq möhacir alaçaq. Bu xaqta ilneñ prem’yer-ministrı Xasinda Ardern belderde. Anıñ äytüençä, koaliśiyä xökümäte ilgä qabul itüçe migrantlar sanın här yıl 1 meñ keşedän 1 meñ 500gä citkerü qararı çığardı. Älege programma 2020nçe yıldan êşli başlayaçaq.

“Koaliśiyä xökümäteneñ yıllıq migrant kvotası öçen bu qadär ähämiyätle häm tarixi ber arttıru yasawı belän ğorurlanam,”-dip urtaqlaştı Xasinda Ardern.  

Ul qararnıñ barı tik möhacirlär tormışın üzgärtep qalmayaçağın, bu keşelärneñ talantları häm belgeçlekläre belän ilne tağın da canlıraq xälgä kiterügä öleş kertäçägen söyli.

Yaña Zelandiyaneñ 2016nçı yılğa qadär migrant kvotası 750 ide. Ul çor xökümäte bu sannı 1 meñgä citkerde. 2020dän - 1500 bulaçaq. Monnan tış, Yaña Zelandiya Avstraliyägä köymälär belän kilgän qaçaqlardan här yıl 150sen ilgä qabul itärgä teli. Ämma Avstraliyä bu täq’dimne qabul itmi - älege qaçaqlarnıñ Yaña Zelandiyädä watandaşlıq alğannan soñ ike il arasındağı kileşüdän faydalanıp qabat Avstraliyägä kiläçägen farazlıylar.



Bäyläneşle xäbärlär