Här 5 sekund sayın ber bala açlıqtan ülä

"Dön’yada 300 trillion dollarlıq mölkät bar ikän, bu wäzğıyät’ qabul häm ğafu itelä torğan tügel"

Här 5 sekund sayın ber bala açlıqtan ülä

Dön’yada här 5 sekund sayın ber bala açlıqtan ülä.

BMO bik küp oyışmalar yärdämendä xäzerlängän “Dön’yada azıq-tölek qurqınıçsızlığı häm tuqlanu torışı” isemle xisabın täq’dim itte. Bu uñaydan Azıq-tölek häm awıl xucalığı oyışmasınıñ Rimdağı üzägendä cıyılış ütte. Anda ğomum direktör Xose Graśiano Da Sil’va dön’yada açlıqqa duçar bulğan keşelärneñ sanınıñ öçençe tapqır artuın belderde. Uzğan yıl 821 million keşeneñ citärsez tuqlanuı terkälgän. Anda töp säbäb - xärbi bäreleşlär bulğan. Bıyıl isä klimat üzgäreşläre artqan häm bu awıl xucalığına zur yoğıntı yasağan.   

Bötendön’ya azıq-tölek programması başqarma direktorı Dêvid Besli isä: “Här 5 sekundta 1 bala açlıqtan ülä. Dön’yada 300 trillion dollarlıq mölkät bar ikän, bu wäzğıyät’ qabul häm ğafu itelä torğan tügel,”-dide.

Besli 22-23 million tiräse keşeneñ klimat üzgärü arqasında yäşägän cirlären taşlap kitärgä mäcbür buluın belderde.

Xisapta äytelgänçä, açlıqtan integüçelär sanı 2017nçe yılda 821 millionğa citkän. Bu san gel artuda. Xäl Kön’yaq Amerika häm Afrikada torğan sayın naçaraya.   

Belgeçlär 2030nçı yılğa qadär açlıq häm naçar tuqlanu bulmağan sistema tözergä xıyallana. Monıñ öçen tuqlanu häm yäşäm çığanaqlarınıñ nıqlığın, adaptaśiyä mömkinleklären arttıru kiräk.



Bäyläneşle xäbärlär