Greśiyä rus diplomatların qudı

Afina bu qararınıñ säbäbe itep diplomatlarnıñ ilneñ êçke êşlärenä tıqşınuı häm milli qurqınıçsızlıqqa yanawların kürsätte

Greśiyä rus diplomatların qudı

Greśiyädän 2 rus diplomatı quıldı häm 2senä ilgä kerü tıyıldı. Afina bu qararınıñ säbäbe itep diplomatlarnıñ ilneñ êçke êşlärenä tıqşınuı häm milli qurqınıçsızlıqqa yanawların kürsätte.  Cirle xäbärlärdä yazılğança, ğayepläwlär arasında mäğ’lümat cıyu häm taratu, däwlät xezmätkärlärenä rişwät birü urın alğan. Qararnıñ maqsatı – Rusiyäneñ Greśiyädäge yoğıntısın arttırırğa mataşuına qarşılıq birü. Xäbärdä, şulay uq, Greśiyäneñ Rusiyä belän yaxşı mönäsäbätlär urnaştırırğa, ike däwlätneñ duslığına öleş kertergä, xökümätlär arasında xezmättäşlek häm ictimağıy oyışmalarnıñ bäyläneşlären üsterergä teläwe, ämma monıñ qarşılıqlı räweştä cir bötenlege häm suverenlıqqa xörmät belän alıp barılırğa tiyeşlege assızıqlandı.

“Afina härwaqıt, ayıruça, Angliyädä êlekkege rus şımçısı Sergey Skripal’ häm qızı Yuliyanıñ ağulanuınnan soñ, Rusiyä belän mönäsäbätlärenä saq qaradı, başqa illär şikelle rus diplomatların qumadı,”-diyelä xäbärdä. Anda urın alğan başqa ğayepläw isä, Rusiyäneñ Balkannarda Makedoniyanıñ isemen almaştıru şikelle qayber çeterekle milli mäs’älälärgä häm Greśiyäneñ mänfäğat’lärenä tıqşınuı.

Qayber diplomatik çığanaqlar Afina qararaınıñ Rusiyä-Greśiya bäyläneşlären maqsat itep almawın, barı äytelgän 4 keşegä genä qağılışlı buluın söyli. Rusiyä moña qarşılıq kürsätkän oçraqta, êşlärneñ tağın da naçarğa kitäçägen farazlıylar.



Bäyläneşle xäbärlär