BMO iminlek şurası aşığıç räweştä cıyıldı

Anda süz İzrail’ köçläreneñ ut açıp Gazzä çigendä 62 fälästinlene üterüe turında bardı

BMO iminlek şurası aşığıç räweştä cıyıldı

Berläşkän Millätlär İminlek şurası Kuveytnıñ taläbe belän aşığıç räweştä cıyıldı. Anda süz İzrail’ köçläreneñ ut açıp Gazzä çigendä 62 fälästinlene üterüe turında bardı. Cıyılış başlanğançı şähitlär öçen 1 minutlıq tınlıq iğ’lan itelde.

AQŞnıñ daimi wäkile Xaley, şurada çığış yasap, Urta Könçığıştağı dähşätle waqıyğalar häm keşelärneñ ğomere özelüe öçen borçıluların belderde. Ul Berläşkän millätlär iminlek şurasın ikele standartlarda ğayepläde. “Arabızda kaysıbız çigendä mondıy tördäge çaralar ütkärelüen qabul itär, sezdän sorıym? Berebez dä. Bu zaldağı hiçber il İzrail’dän tağın da artıq ayıq aqıllılıq kürsätä almas ide,”-dide ul İranğa törtterep. Xaley İrannı kürşe illär Süriyä, Yämän häm Livannı totrıqsızlaştıruda ğayepläde. Ul şuranıñ diqqaten töbäktä dähşätkä säbäpçe bulğan İranğa yünältergä kiräklegen belderde. Daimi wäkil, şulay uq, İrannıñ Xamasqa yärdäm itüen tänqıyt’läde. “Xamas yıllardır dähşätne provokaśiyäli. Ul İzrail’ iminlek köçläre häm infrastrukturasına qarşı höcüm başladı,”-di Amerika wäkile. Xaley AQŞ ilçelegeneñ Qudüskä küçenüeneñ döres qarar buluın assızıqladı. Häm Qudüsne İzrail’ başqalası bularaq tanunıñ solıx prośessına uñay êtärgeç bulacağın belderde.

Rusiyäneñ BMOdağı daimi wäkile urınbasarı Dmitriy Polyanskiy isä Fälästin ilbaşı Mäxmüt Abbas häm İzrail’ xökümäte räise Binyamin Netanyaxunı tınıç çişeleş öçen Mäskäwdä oçraşırğa çaqırdı.

Angliyanıñ BMOdağı daimi wäkile Karen Pirs ta İzrail’neñ çiklären saqlaw xoquqı buluın, ämma iminlek saqlawçılarnıñ çamasız köç qullanmawı kiräklegen belderde.         

Franśiya wäkile Fransua Delattre dähşätle waqıyğalarnıñ çiktän uzıp böten töbäkkä cäyelü mömkinlegen iskärtte. Ul Urta Könçığıştağı wäzğıyät’neñ “böyek dawıl”ğa oxşawına basım yasap: “Gazzädäge waqıyğalar töbäktä barı tik radikal’ häm bulaçaq terrorçı oyışmalarına nigez sala,”-dide.

Boliviya wäkile Saşa Serxio L’orentti Soliz isä Gazzädä ğomere özelgän balalarnıñ isemnären beräm-beräm uqıp çıqtı häm İzrail’ne Fälästin cirendäge basıp aluların tuqtatırğa çaqırdı. Ul Xalıqara cinayät’ mäxkämäseneñ Gazzä çigendä bulğan waqıyğalarnı soraştıra başlarğa tiyeşlegen assızıqladı.

Qıtaynıñ daimi wäkile Ma Çjaosüy İzrail’ne ayıq aqıllı bulırğa çaqırdı. Pol’şa wäkile Djoanna Vroneśka Gazzädä 62 fälästinleneñ üterelüe belän bäyle bağımsız soraştıru ütkärergä kiräklegenä basım yasadı.

BMOnıñ Urta Könçığış solıx prośessı maxsus koordinatorı Nikolay Mladenov isä Gazzä çigendä qoralsız keşelärgä ut açqan İzrail’ iminlek köçläreneñ dähşäten iñ köçle şäkeldä tänqıyt’ utına totarğa kiräklegen söyläde. Ul xalıqara cämäğat’çelekne Gazzädäge qanlı waqıyğalarğa çik quyarğa, töbäktä yaña suğışnı buldırmıy qalırğa çaqırdı.

Fälästinneñ BMOdağı wäkile Riyad Mansur isä, İminlek şurasınıñ xäräkätkä küçüe öçen tağın niçä fälästinleneñ ülüe kiräklegen soradı. “Ägär sezneñ ilegezdä ütereş bulsa, 24 säğat’ êçendä balalar belän bergä 60 keşe üterelsä – nişlär idegez?... Bu ikele standartlar tağın niqadär däwam itäçäk?”-dide fälästinle wäkil.
 



Bäyläneşle xäbärlär