Makron AQŞqa kitä

Franśiya ilbaşı Êmmanuêl Makron 23nçe-26nçı aprel’ könnärendä Vaşingtonğa säfär yasayaçaq. Anıñ qısalarında AQŞ prezidentı Donal’d Tramp belän oçraşuı kötelä. Kön tärtibendä – Süriyädä monnan soñ däwam ittereläçäk êşlär, AQŞ belän Franśiya häm Awrupa Berlege mönäsäbätlären nığıtu temaları.

Makron säfär aldınnan Amerikanıñ Fox N’yus telekanalına interv’yu birde.

Ul anda Amerikalı xärbilärne Süriyädän çigenmäskä çaqırdı. Yuqsa, bu “qırnı İranğa häm Süriyä ilbaşı Bäşşar Äsadqa qaldırıp kitü” bulacağın belderde. Makron äytkänçä, DEAŞ ciñelgännän soñ AQŞ, Franśiya häm başqa xezmättäşlär Süriyäne yañadan torğızuda möhim rol’ uynayaçaq.

 Franśiya ilbaşı Makronnıñ säfäreneñ iñ zur maqsatı isä Trampnı 2015nçe yılda İran belän xalıqara cämäğat’çelek tözegän Atom-töş kileşüen yırtmasqa ışandıru.

Tramp İrannıñ atom-töş êşçänlegen küzätüne däwam itterergä, ä menä kileşüdäge  älege êşçänlekne 2025-2030nçı yıllarda beterergä digän punktnı yuqqa çığarırğa teli.