د ترکیې ولسمشر د وال ستریت ژورنال ورځپاڼې ته مقاله لیکلې

اردوغان : اروپا او امریکا باید د سوریې د ادلیب په اړه د مسئولیت احساس وکړي

د ترکیې ولسمشر د وال ستریت ژورنال ورځپاڼې ته مقاله لیکلې

 د ترکیې ولسمشر رجب طیب اردوغان  وویل چې  په سوریه کې د اسد د رژیم لخوا په ادلیب  باندې برید به  ترکیه، اروپا او یو زیات  شمیر نور  د جدي  انساني  او امنیتي ګواښونو سره  مخامخ  کړي.

ولسمشر اردوغان  دا څرګندونې  د امریکا د وال ستریت ژونال ورځپاڼې ته په لیکلي مقاله کې کړي دي.

ولسمشر اردوغان  ددې خبرې په ټینګار ویلي دي چې  پداسې حال کې چې هره شیبه  ادلیب  د ډیرو  سترو بریدونو  د ګواښ سره مخامخ  دی  نړۍواله ټولنه  باید خپل مسئولیت احساس کړي. پدې مسله کې د پسیف  پاتې کیدو  بدل به  ډیر لوی  وي. مونږ نشو کولای  چې  د سوریې  مظلوم  ملت  د بشار اسد مرحمت ته  پریږدو.

ولسمشر اردوغان  دا څرګندونې  وال ستریت ژورنال  ورځپاڼې ته ( نړۍ باید د اسد مخه ونیسي )  د سرلیک لاندې  په مقاله کې کړي دي. ولسمشر اردوغان پدې مقاله کې د سوریې په قبال کې د ترکیې  موقف  او د ادلیب ښار د وروستیو پرمختګونو په اړه  معلومات ورکړي دي.

ولسمشر اردوغان ویلي دي چې  ترکیې  د ادلیب په مسله کې  د خپل وس او توان نه ډیر څه کړي دي. په سوریه کې په تیرو ۷ کلونو کې د بشار اسد ظلمونه  او کړنې  په ډاګه دي.

ولسمشر اردوغان  په ادلیب کې  د اسد د رژیم  وروستیو بریدونو ته په اشارې سره ویلي دي، پر ادلیب  د اسد د بریدونو  اصلي هدف  او موخه  د ترهګرۍ پر وړاندې مبارزه  نده  بلکې ددوې اصلي هدف  په هیواد کې  مخالفین په کامله توګه له منځه وړل دي.

ولسمشر اردوغان په ټینګار ویلي دي چې  ادلیب  پل ته د رسیدو نه مخکې وروستی تم  ځای دی. که چیرې د ادلیب په مسله کې  اروپا او امریکا ناکامه پاتې شي  او اسد خپل هدف ته  ورسیږي  ددې خبرې بدل به یواځې  د سوریې مظلوم خلک د خپلو وینو سره نه بلکې ټوله نړۍ به  دا بدل ورکوي.

ترکیې  تر اوسه پورې پدې سیمه کې د روان قتل عامونو  د مخنیوي په خاطر تر خپل وسه پورې هڅه کړې او ددینه وروسته به يي هم  وکړي.

ولسمشر اردوغان ویلي دي چې ترکیه نن ورځ  د څه باندې  درې نیم میلیونه تنه سوري کډوالو کوربه توب کوي. ترکیې  د سوریې په مسله کې د ټولې نړۍ نه  دروند  بار  په اوږو کړی دی.

همداشان  ددې سره سم  په سوریه کې  د داعش  او پ ک ک ترهګرو ډلو سره مو هم  مبارزه کړې ده. ددوې  د ټولو بریدونو  او چټلو  اهدافو  سره سره  مونږ  خپلو بشري مرستو ته دوام  ورکړی دی.

ولسمشر اردوغان د ادلیب په مسله کې په امریکا  ، مسکو او تهران غږ کړی دی« امریکا چې یواځې د کیمیايي وسلو خبره ټینګه کړې ده باید  د مرګونو ترمنځه  د توپیر نه لاس واخلي. هغه څوک چې  د کیمیايي وسلو سره وژل کیږي هغه  مرګ  دی او هغه څوک چې د نورو وسلو سره وژل کیږي ایا هغه مرګ  ندی. نن ورځ  په سوریه کې د کانوانسیونل  یا نورو وسلو سره  لا ډير زیات  خلک وژل کیږي. هو دا هم  حقیقت  دی چې  په سوریه کې  د روانو قتل عامونو د مخنیوي یواځنی  مسئول  لویدیځ نړۍ نده. روسیه او ایران هم  ددې قتل عامونو د مخنیوي په برخه کې  ډیر زیات مسئولیت لري.»

ولسمشر اردوغان ویلي دي چې  اسد نن  ورځ  غواړي چې خپلو دې بریدونو او قتل عامونو ته  د ترهګرۍ پر وړاندې د مبارزې تر بهانې لاندې  مشروعیت ورکړي. هیڅوک باید  د اسد پدې خبرو فریب ونخوري. نن ورځ  په نړۍ کې هیڅ بل هیواد  د ترکیې په اندازه د ترهګرۍ د ګواښ سره مخامخ  ندی. خو اصلي خبره داده چې د بشار اسد  د حل لاره  غلطه ده. د ترهګرۍ پر وړاندې د مبارزې په بهانه باید  معصوم انسانان  قرباني نکړی شي.

د اسد  اوسنی  دریځ  او چلند  یواځې افراطیت  او ترهګرۍ ته  زمینه برابروي. که چیرې د داعش ترهګرې ډلې او نورې  افراطي  ډلو رامنځته کیدو نه وګورو یواځنی  لامل يي همدا مسله ده.

ولسمشر اردوغان  وویل چې  دا هم  حقیقت  دی چې  د ادلیب په ښار کې هیت تحریر الشام  ترهګره ډله  شتون لري. خو دا ډله  ددې ښار  يه یوې ډیرې  کوچنۍ برخه  ده.

دا ډله  ددې ښار د نفوس  یوه ډیره کوچنۍ  برخه  تشکیلوي. یعنې د ترهګرۍ پر وړانډې په مبارزه کې باید د ملکي وګړو د مرګ ژوبلې مخه ونیول شي.

ترکیه  د لسګونو کلونو راهیسې د ترهګرۍ پر وړاندې مبارزه کوي. یو تن ملکي وګړي ته يي زیان  ندی رسولی .

همداشان  د داعش پر خلاف په مبارزه کې هم  ترکیې  یو تن ملکي وګړي ته زیان ندی رسولی .    

 



اړوند خبرونه