د روسیې پوځي الوتکه لا درکه شوې ده
د روسیې یوه پوځي الوتکه د مدیترانې د سمندر د پاسه لا درکه شوې ده.
1051519
د روسیې د دفاع وزارت ویلي دي چې ددوې یوه پوځي الوتکه چې ۱۴ تنو سرتیرو پکې شتون درلود د مدیترانې سمندر د پاسه د رادار سره اړیکې پرې شوي او لا درکه شوې ده .
د روسیې د دفاع وزارت لخوا د خپور شوي بیان له مخې الوتکه په سوریه کې د روسیې د الحمیم پوځي هډې ته روانه وه چې په مدیترانه کې لا درکه شوه.
په بیان کې راغلي دي چې دا الوتکه د اسراییلو د ۴ اف ۱۶ الوتکو لخوا د سوریې د لازقیه پر ښار د بریدونو پر مهال لا درکه شوې ده . د بله پلوه په مدیترانه کې د فرانسې یوې جنګي بیړۍ په سیمه د توغندي برید هم تثبیت کړی دی.
په بیان کې ویل شوي دي چې د الوتکې او په الوتکې کې د سپرو ۱۴ تنو سرتیرو برخلیک نا څرګند دی او تر اوسه پورې پدې اړه هیڅډول نښه او نښانه نده موندل شوې.