د ټرامپ دریم فرمان هم وځنډول شو

امریکا ته د ایران په ګډون د ځینو هیوادونو  په وګړو په سفر د محدودیت لګولو اړوند د ولسمشر  دونالد ټرامپ  دریم  فرمان  هم  وځنډول شو.

د امریکا د هاوايي د ایالت د  فدرال محکمې  قاضي  د ټرامپ په فرمان  د نیوکو  او اعتراضونو نه وروسته  د ټرامپ  د دریم  فرمان د ځنډولو پریکړه وکړه.

د امریکا ولسمشر دونالد ټرامپ  ددینه مخکې دوه ځله  پدې اړه فرمانونه  صادر کړي وو چې  د محاکمو لخوا ځنډول شوي وو.

همداشان  د هاوايي د ایالت فدرال محکمې  بیا  امریکا ته تګ راتګ په خاطر  د ایران په ګډون د ځینو هیوادونو په وګړو  په ویزو د بندیز لګولو  په اړه  خپور کړی  دریم  فرمان  د بشري حقونو  سره په ټکر کې وباله  او د ځنډولو حکم يي وکړ.

د ویلو ده چې  د هاوايي  ایالت د فدرال محکمې قاضي  یواځې  یو ورځ  مخکې ددینه چې  د ټرامپ  دریم  فرمان  عملي جامه  واغوندي  وځنډو.

د ټرامپ  ددې فرمان  له مخې  د ایران، سوریې، لیبیا، چاد، یمن ، شمالي کوریا  او وینزویلا په  وګړو  امریکا ته  د  تګ راتګ په خاطر په ویزو  بندیز لګول شوی وو.

ټرامپ  ویلي وو دا  بندیزونه په هیواد کې  ترهګریزو ګواښونو د کچې د راټیټولو په خاطر لګول کیږي.

ولسمشر ټرامپ  په تیرو فرمانونو کې یواځې  د اسلامي هیوادونو په وګړو  امریکا ته د راننوتو په خاطر  په ویزو بندیز لګولی وو خو  پدې فرمان کې بیا  شمالي کوریا ته هم  ځای ورکړ.

د هاوايي  ایالت څارنوال   داګ چین  د ټرامپ  دا فرمان هم  د تیرو فرمانونو په څیر د تبعیض نه ډک بللی  دی  او ویلي دي چې  دا فرمان یواځې  امریکا ته د مسلمانانو د راننوتو پر خلاف  یو ډول خنډ جوړول  دي.

د هاوايي ایالت  څارنوالانو او ځینو خلکو  فدرال محکمې ته  د ټرامپ د تیرو فرمانونو په څیر  د دریم فرمان پر خلاف هم  شکایت وکړ. محکمې قاضي  در یک واتسون  د نوموړو  شکایتونو  نه وروسته  د فرمان د ځنډولو حکم  وکړ. قاضي وویل چې  دا فرمان هم  د تیرو  ناروغو فرمانونو  په څیر  یو ډول ناروغي ده. هغه  د ټرامپ دا فرمان د امریکا  د ګټو پر خلاف بللی  دی.

قاضي ویلی دي چې  د ټرامپ  دا فرمان او غوښتنه په اصل کې د انسانانو ترمنځه  د هغوې د دین او ملیت  له امله  ښکاره تبعیض کول دي.

د بله پلوه سپینې ماڼۍ  د فدرال محکمې دا حکم  ناسم  بللی  او ویلي چې دا په ښکاره توګه  د امریکا د خلکو نه د حفاظت په برخه کې  د ټرامپ د هلو ځلو پر وړاندې خنډ جوړل دي.

سپینې ماڼۍ ویلي دي چې د ټرامپ  دا اقدام  یو ډیر پر ځای اقدام  دی او د عدلیې وزارت به  دا مسله تعقیب  او د ټرامپ د فرمان نه به دفاع وکړي.