اسراییلو د اردن نه بښنه وغوښته.
د اسراییلو حکومت د اردن نه په رسمي توګه بښنه وغوښته
اسراییلو د اردن نه بښنه وغوښته.
د اردن د حکومت ویاند محمد المومني وویل چې د اسراییلو د عمان په سفارت کې د دوو اردنیانو د وژنې له امله په رسمي توګه بښنه غوښته.
ویاند وویل چې د اسراییلو حکومت په پلازمینه عمان کې د نوموړي هیواد په سفارت کې په رامنځته شوې پيښه کې د دوو تنو اردني وګړو د مرګ له امله په رسمي توګه د بښنې غوښتنه وکړه.
هغه ویلي دي چې د اسراییلو د بهرنیو چارو وزارت پدې اړه خواشیني او پښیماني څرګنده کړې ده . د اسراییلو د بهرنیو چارو وزارت ویلي دي چې ددې پیښې په اړه به قانوني ګامونه اوچت کړي.
د یادولو وړ ده چې د ۲۰۱۷ کال د جولای په میاشت کې یو تن اردني ترکاڼ چې د موبل فرنیچر د جوړولو په خاطر د اسراییلو سفارت ته تللي وو هلته يي د اسراییلو د سفارت د یو تن امنیتي کارکوونکي سره لفظي شخړه وکړه. لفظي شخړه وروسته په فزیکي شخړې بدله شوه او اردني ترکاڼ په اسراییلي باندې د پیچکش سره برید وکړ. اسراییلو د سفارت امنیتي کارکوونکي بیا په اردني ترکاڼ ډزې وکړې چې په پایله کې ترکاڼ او د اسراییلو د سفارت د ودانۍ خاوند اردني وګړي ژوند د لاسه ورکړ.
اردن حکومت ددې پيښې په مقابل کې ډیر سخت غبرګون وښود او د اسراییلو د سفارت د تړولو امر يي وکړ. د اردن حکومت ویلي وو تر کومه چې اسراییلو حکومت برید کوونکي ته قانوني سزا ورنکړي ددوې د سفارت پرانیستو ته به اجازه ورنکړي.