د پاکستان د سند په ایالت کې په ځانګړو ځواکونو غبرګ بمي بریدونه وشول

د پاکستان  د سند ایالت  په  لاړکانه   ښار کې  د ځانګړو ځواکونو په پوستې  غبرګ بمي بریدونه وشول.

د ترلاسه شوو معلوماتو له مخې  پیښه  د سند ایالت د لاړکانه ښار د میروخان په څلور لارې کې  رامنځته شوې ده .

په پیښه کې  یو تن پاکستاني سرتیری  مړ  او د پنځو تنو سرتیرو په ګډون  ۱۴ تنه نور ټپیان شوي دي.

د پیښې ټپیان سمدلاسه روغتونونو ته انتقال او د درمنلې لاندې نیول شوي دي.

د سیمې پولیسو خبري رسنیو ته ویلي دي چې  لومړنیو څیړونو کې  معلومه شوې ده چې  یو بم د ځانګړو ځواکونو  د پوستې ترڅنګ په یو بایسکل کې ځای په ځای  شوی وو.

د پیښې په اړه  څیړنې پیل شوي دی. همداشان پولیسو  په سیمه کې  د روانو څيړونو په ترڅ کې دوه تنه  د چاودنو په تړاو  نیولي دي.