თურქული პრესა 22.05.2018

თურქული პრესის მოკლე მიმოხილვა

მიმოხილვას ვიწყებთ გაზეთ „საბაჰ“-ში გამოქვეყნებული ინფორმაციით, რომლის თანახმადაც, პრეზიდენტმა რეჯებ თაიპ ერდოღანმა სამართლიანობისა და განვითარების პარტიის ცენტრალურ ოფისში გამართულ ელჩებთან ტრადიციულ იფთარის ვახშამზე განაცხადა: „წმინდა იერუსალიმზე უფლებების დათმობას არ ვაპირებთ. ჩვენს პირველ ყიბლას, ათეულობით წლის მანძილზე სისხლით, ცრემლითა და ოკუპაციით გამოკვებილი სახელმწიფოს მოწყალების იმედზე არასოდეს მივატოვებთ.“

გაზეთი „ვათანი“-ს ინფორმაციით, აშშ-მა ფოლადისა და ალუმინის გადასახადებში თურქეთს შეღავათები არ მისცა. ეკონომიკის მინისტრის მოადგილემ, ფათიჰ მეთინმა, აშშ-ის დედაქალაქ ვაშინგტონში კასპიის პოლიტიკის ცენტრის მიერ (CPC) ორგანიზებულ 2018 წლის ტრანს-კასპიის ფორუმში მიიღო მონაწილეობა, სადაც თურქეთ-ამერიკის ეკონომიკურ ურთიერთობებზე ისაუბრა. მან აშშ-ს მიერ იმპორტირებულ ფოლადზე და ალუმინზე დაწესებული დამატებითი გადასახადები შეაფასა და აღნიშნა: „თუ ახლო მომავალში თურქეთის სასარგებლოდ ცვლილება არ მოხდება, მსოფლიო სავაჭრო ორგანიზაციას მივმართავთ და საპასუხო ზომებს გავატარებთ. ან ეტაპზე ამერიკის ბოლო შეფასებებს ველოდებით.“

თურქეთის ელექტრო ენერგიის წარმოების პროფილმა გასულ კვირაში ისტორიული პროცესი გაიარა - წერს გაზეთი სტარი. კვირის დასაწყისში ელექტრო ენერგიის წარმოებაში ბუნებრივი აირის წილი ყველა დროის რეკორდულ დონემდე, დღიურ ბაზაზე 21%-მდე დაეცა. იყო დრო, როდესაც მთლიანი ელექტრო ენერგიის თითქმის ნახევარი ბუნებრივი აირისგან იწარმოებოდა. იმპორტირებული ქვანახშირის წილი 22%-მდე გაიზარდა. ენერგეტიკის სპეციალისტები აცხადებენ, რომ იმპორტირებულ ქვანახშირზე მომუშავე სადგურები უფრო დიდი მასშტაბებით არიან ჩართული წარმოებაში.

გაზეთ „ჰაბერ თურქ“-ში ყურადღებას იპყრობს სტატია სახელწოდებით „სტამბოლიდან 4 თვეში 32 მილიონზე მეტი მგზავრი გაფრინდა“, რომლის თანახმადაც, სახელმწიფო საჰაერო მოედნების მართვის გენერალური სამმართველოს მონაცემებით, ათათურქის და საბიჰა გოქჩენის სახელობის აეროპორტებში მიმდინარე წლის პირველ ოთხ თვეში მიღებული მგზავრთა რაოდენობა 2017 წლის ამავე პერიოდთან შედარებით 4 მილიონ 845 ათას 581-ით გაიზარდა და 32 მილიონ 218 ათას 911 შეადგინა. აეროპორტებიდან ამ პერიოდში 220 ათას 746 რეისი შესრულდა და 2017 წლის ამავე პერიოდთან შედარებით ეს 15 ათას 87 რეისით მეტია.

და ბოლოს, გაზეთი „იენი შაფაკი“ იუწყება, რომ თურქეთის საავტომობილო სექტორის მნიშვნელოვანი მწარმოებლებიდან Honda თურქეთში დამზადებულ მეათე თაობის Civic Sedan-ს ახალი ძრავისა და გადამცემთა კოლოფის არჩევანით, მარჯვენა საჭის ვერსიით ინგლისის, ირლანდიისა და კვიპროსის ბაზარზე გაიტანს.