Azərbaycan da korona virusu ilə bağlı İranla sərhədlərini bağladı

  Dünya Səhiyyə Təşkilatının tövsiyələri və digər dövlətlərin təcrübələrini nəzərə alaraq korona virusu (Kovid-19) riskinin yayılması ilə əlaqədar 2020-ci il fevralın 29-da saat 16.00-dan etibarən iki həftəlik müvəqqəti dövr ərzində Azərbaycan Respublikası və İran İslam Respublikası arasında dövlət sərhədlərinin məhdudlaşdırıcı rejim əsasında bağlanması barədə qərar qəbul olunub.

  Nazirlər Kabinetinin Mətbuat Xidməti bildirir ki, yaranmış vəziyyət İran İslam Respublikasının aidiyyəti dövlət qurumları ilə müzakirə olunub və Azərbaycan Respublikasının bu qərarı barədə İran İslam Respublikasına məlumat verilib.

  İran İslam Respublikası ilə əlaqələndirilmiş şəkildə Azərbaycan ərazisində olan İran vətəndaşlarının ölkədən çıxması, İran ərazisində olan Azərbaycan vətəndaşlarının müvafiq rejim tətbiq olunmaqla ölkəyə gəlməsini təşkil etmək üçün zəruri dəhliz təmin olunacaq. Zəruri hallarda, İran İslam Respublikası vətəndaşlarına humanitar əsaslarla vizaların rəsmiləşdirilməsi həyata keçiriləcək.

  Azərbaycan Respublikası Dünya Səhiyyə Təşkilatı, dost və tərəfdaş dövlətlərlə koronavirus riski ilə əlaqədar təmasları və əməkdaşlığı davam etdirir.

  Qeyd edək ki, İrandan Azərbaycana gələn iki nəfərdə korona virusu aşkara çıxıb. Sözügedən mövzu ilə əlaqədar Azərbaycan vətəndaşları sərhəd xəstəxanalarında karantinə götürülüb, vəziyyətləri stabildir.

  Azərbaycanda “Kovid-19” virusu ilk dəfə 29 fevralda rəsmi olaraq təsbit edilib. Bu səbəbdən İrandan Azərbaycana keçən bir Rusiya vətəndaşı virusla bağlı karantinə alınıb.