Türk Dünyasından Xәbәrlәr
“Türk Dünyasından Xəbərlər” bölümündə Türk Dünyasında baş verən hadisələr barəsində söhbətimiz olacaq.
Hörmətli oxuçularımız ilk xəbərimiz Azәrbaycan barәdәdir.
Azərbaycanın paytaxtı Bakının ev sahibliyi etdiyi IV İslam Hәmrәyliyi Oyunlarının rәsmi açılış mәrasimi Bakı Olimpiya stadionunda keçirilib.
Oyunlarda 54 ölkәni tәmsil edәn 3 mindәn çox idmancı iştirak edib. Yarışlar 21 idman növü üzrә keçirilib.
Azərbaycanı bu oyunlarda 325, Türkiyəni isə 345 idmançı təmsil edib. İdmançıların sayına görə üçüncü yerdə 300 atletlə İran qərarlaşıb.
Qeyd edәk ki, V İslam Hәmrәyliyi Oyunları 2021-ci ildә Türkiyәdә keçirilәcәk.
Bu arada Türkiyәnin dövlәt başçısı R.T. Ərdoğan Azərbaycanın paytaxtı Bakıda keçirilən IV İslam Həmrəylik Oyunlarında qızıl medal qazanan idmançıları təbrik edib.
Bu barәdә Prezident Aparatının mәtbuat xidmәtindən verilən mәlumatda bildirilir.
Hörmətli oxuçularımız ikinci xəbərimiz Türkmənistanla bağlıdır.
Türkmənistanın paytaxtı Aşqabadda Xəzəryanı dövlətlərin səlahiyyətli nümayəndələrinin ikinci iclası keçirilib.
Türkmənistanın xarici işlər nazirliyində keçirilən iclasda Azərbaycan, Türkmənistan, Qazaxıstan, Rusiya və İranın xarici işlər və nəqliyyat nazirliklərinin rəsmiləri və mütəxəssisləri iştirak ediblər.
İclasın gündəliyindəki əsas mövzu Xəzər dənizində nəqliyyat sahəsində əməkdaşlıq sazişi layihəsinin detallarının razılaşdırılmasıdır.
2014-cü ilin sentyabr ayında Rusiyanın Həştərxan vilayətində təşkil edilən Xəzəryanı Dövlət Başçılarının IV toplantısında Türkmənistan prezidenti Qurbanqulu Berdimәhәmmәdov tərəfindən kommersiya və iqtisadi əməkdaşlıq məsələlərini ehtiva edən müqavilə layihəsi təqdim edilmişdi.
Məqsəd Xəzəryanı dövlətlər arasında ticarət və iqtisadi əməkdaşlığı inkişaf etdirməkdir. Sözügedən müqavilədə Xəzər dənizinin təbii ehtiyatlarından istifadə etməklə qonşu ölkələrdə enerji, sənaye və Xəzər bölgəsi tranzit nəqliyyat məsələləri əks olunur.
Toplantıda heyәtlәr xüsusilə Xəzər dənizində Nəqliyyat Əməkdaşlığı Layihəsi üzərində danışıqlar aparıb. Layihə Xəzəryanı ölkə başçılarının növbəti toplantısında daha ətraflı müzakirə ediləcək və sonda müqavilə imzalanacaq.
Qeyd edək ki, Xəzər dənizində nəqliyyat әməkdaşlığı sazişi Xəzərin Şərq-Qərb və Şimal-Cənub qitə yollarının birləşdirilməsi, beynəlxalq tranzit potensialı, yük və sərnişin daşımalarının nizama salınması, infrastrukturun inkişaf etdirilməsi, bütün iştirakçıların maraqlarına uyğun gələcək aydın hüquqi qaydaların təsdiq edilməsi üçün nəzərdə tutulub.
Hörmətli oxuçularımız növbəti xəbərimiz də Türkmənistanla bağlıdır.
Hər il mayın 18-də Türkmənistanda Konstitusiya günü və Türkmənistanın tanınmış şairi Mahdumkulu Firakinin xatirəsinə həsr olunan tədbirlər keçirilir.
1724-1807-ci illərdə yaşamış Mahdumkulu Firaki yalnız Türkmənistanda deyil, bütün Orta Asiya regionunda tanınan, sevilən, hörmətlə yad edilən xalq şairi və filosofdur.
Türkmənlər Mahdumkulu Firakini ən dəyərli mədəniyyət xəzinələrindən biri və Türkmən ədəbiyyatının təməl daşı hesab edirlər.
Ölkədə hər il onun xatirəsinə hәsr olunan "Mahdumkulu Firaki Poeziya Günü" adı altında tədbirlər keçirilir.
Mahdumkulu Firakinin İranın Xorasan bölgəsinin Ak Tokay kəndində yerləşən qəbri hər il olduğu kimi bu il də türkmənlər tərəfindən ziyarət edilib.
Hörmətli oxuçularımız növbәti xәbәrimiz Türkiyә ilә bağlıdır.
15-20 may tarixləri arasında Mersin Böyükşəhər Bələdiyyəsinin təşkilatçılığı ilə keçirilən ‘‘Türk Dünyası Teatr Günləri’’ adlı tədbirdə Qırğızıstan Milli Akademik Dram Teatrının "Dədə Qorqud" adlı tamaşası nümayiş olunub.
Tamaşanı Mersin Böyükşəhər Bələdiyyəsinin sədri Burhaneddin Kocamaz başda olmaqla TÜRKSOY-un baş katibi Düsen Kaseinov, Türkiyə və Qırğızıstan Respublikasının məsul nümayəndələri, ictimai xadimləri, müxtəlif ölkələrdən tədbir üçün gələn teatr qrupları və çox sayda tamaşaçı izləyib.
Tamaşadan sonra çıxış edən Mersin Böyükşəhər Bələdiyyəsinin sədri B.Kocamaz Türk tarixində çox əhəmiyyətli yeri olan Dədə Qorqudla bağlı belə bir tamaşanın Mersində nümayiş olunmasının sevindirici olduğunu bildirib. O, tədbirin Türk mədəniyyətini gələcək nəsillərə ötürmək baxımından önəmli olduğunu qeyd edib. Bidirib ki, bu cür tədbirlərin məqsədi insanları bir araya gətirmək, yaxınlaşdırmaq, dostluq əlaqələrini möhkəmləndirməkdir. TÜRKSOY-un baş katibi Düsen Kaseinov çıxışı zamanı Mersin Bələdiyyəsinin sədri B. Kocamaza töhvələrinə görə təşəkkür edib.
Daha sonra teatr qruplarının nümayəndələri və aktyorlar Cümhuriyyət Meydanında yerləşən Atatürk abidəsinin önünə əklil qoyublar.
Qırqızıstanın Ankaradakı səfiri İbragim Cunusov isə belə bir tədbirdə iştirak etməkdən məmnunluğunu ifadə edib.
Qeyd edək ki, Qırğızıstan Milli Akademik Dram Teatrının qrup rəhbəri Kayrat İmanaliyev də tədbirdə çıxış edərək Qırqızıstandan gətirilmiş hədiyyələri Burhaneddin Kocamaza hədiyyə edib.
Hörmətli oxuçularımız növbәti xәbәrimiz Özbəkistandandır.
Özbəkistan prezidenti Şövkət Mirziyoyevin Çinə etdiyi səfəri çərçivəsində iki ölkə arasında 23 milyard dollarlıq əməkdaşlıq müqaviləsinin imzalandığı bildirilir.
Özbəkistan Prezident Aparatının mətbuat xidmətindən verilən məlumata görə, prezident Ş.Mirziyoyevin 11-15 may tarixləri arasında Çinə etdiyi səfəri çərçivəsində Özbəkistan-Çin hökumətlərarası əməkdaşlıq komitəsinin həmsədri Mıng Ciecu Çin milli xalq konqresinin daimi komitəsinin sədri Canq Dıcianq, baş nazir Li Kıçianq və Çinin dövlət başçısı Şi Cimpinqlə danışıqlar aparıb.
Məlumata görə, Ş.Mirziyoyev çinli iş adamları ilə də görüşüb və ikitərəfli münasibətlərin daha da inkişaf etdirilməsi məsələlərini müzakirə edib.
Məlumatda, Mirziyoyevin səfəri çərçivəsində iki ölkə arasında energetika, infrastruktur, nəqliyyat, tikinti, toxuculuq, əczaçılıq, bank və kənd təsərrüfatı sahəsində əməkdaşlığı nəzərdə tutan və ümumi məbləği 23 milyard dollar olan 100-dən çox müqavilə imzalanıb, həmçinin Özbəkistanla Çin arasında yüksək səviyyəli əməkdaşlıq komitəsinin yaradılması da qәrara alınıb.
Hörmətli oxuçularımız sonuncu xәbәrimiz Tatarıstanla bağlıdır.
Bu İlin ilk rübündə Tatarıstan Respublikasının iqtisadiyyatında 4,2 % -lik artım müşahidə olunub.
Sənaye istehsalı indeksi isə 4,7% artıb. Sözügedən göstəricilər ötən ilin eyni dövründə 2,5 və 3,5 % idi.
Tatarıstan Respublikasının prezidenti Rüstəm Minnihanov göstəricilərdən duyduğu məmnuniyyəti ifadə edərək, maliyyə intizamının qorunmasının vacibliyini vurğulayıb.
R. Minnihanov 8,8 milyard rublluq büdcə kəsirinin bağlanması üçün müvafiq nazirliklərə və idarələrə tapşırıq verdiyini deyib.
Әlaqәli Xәbәrlәr
Qəhrəman qadınlarımız - Mihir Müşviq
Asya İstanbul Rəsm və Heykəl Muzeyi gəzintisinə həvəssiz qatılmışdı.