Perseid meteor yağışının avqustun 11-12-də pik həddə çatacağı gözlənilir

Bu təbiət hadisəsini müşahidə etmək üçün heç bir astronomik cihaza ehtiyac yoxdur.

Perseid meteor yağışının avqustun 11-12-də pik həddə çatacağı gözlənilir

Perseid meteor yağışı artıq başlayıb. Avqustun 11-12-də isə onun pik həddə çatacağı gözlənilir. Bu təbiət hadisəsini müşahidə etmək üçün heç bir astronomik cihaza ehtiyac yoxdur. Bu prosesi dağlıq ərazilərdə adi gözlə də müşahidə etmək olar. 

Türkiyə Elmi və Texnoloji Araştdırma Qurumu Milli Rəsədxanasının həmin mövzuyla bağlı açıqlamasında bildirilib ki, asteroidlərin toqquşması, kometlərin parçalanması nəticəsində planetlərarası fəzada qaz və toz hissəcikləri yaranır. Bu toz hissəcikləri çox böyük sürətlə atmosferə daxil olduğu zaman sürtünmədən yanmağa başlayır. Biz adi gözlə baxdığımızda 3-5 saniyəlik işıqlanma müşahidə edirik. Bizə elə gəlir ki, sanki ulduz düşür. Amma ulduz düşməz. Bu müşahidə etdiyimiz hadisə meteor yağışıdır. Bəzi meteor cisimlərinin sürəti saniyədə 30-40 kilometr olur. Meteorların əksəriyyəti Yer atmosferinin 80-120 kilometrliyində alışır. 30-40 kilometr hündürlükdə isə toz şəklində atmosferə qarışaraq sönür.

Qeyd edək ki, meteor yağışı hər il eyni fəallıqda olmur. Fəallıq müəyyən periodlarda maksimum həddə çatır. Bu zaman meteor seli o qədər güclü olur ki, bu da “ulduz yağışı” adlanır. Yer meteor selinin sıx olduğu meteor orbiti sahəsindən keçən zaman ulduz yağışları müşahidə edilir. Hər il iyulun ortalarından avqustun ortalarına qədər radiantı Persey bürcündə olan meteor seli müşahidə edilir. Bunlar bürcün adına uyğun olaraq Perseidlər adlanır.



Әlaqәli Xәbәrlәr