اردوغان: بیت المقدس نینگ فلسطین پایتختی اوله راق قبول ایتیلیشی کیره ک

جمهوررئیسی اردوغان عدالتلی اولکه لر نی بیت المقدس نی فلسطین پایتختی اوله راق تن آلیش گه چقیردی

اردوغان: بیت المقدس نینگ فلسطین پایتختی اوله راق قبول ایتیلیشی کیره ک

ترکیه جمهوریتی نینگ استانبول شهریده اسلام همکارلیک تشکیلاتی نینگ رهبر لر ییغیلیشی باشله دی. 

اوشبو ییغیلیش امریکا قوشمه ایالت لری دولت رهبری دونالد ترامپ نینگ بیت المقدس نی اسرائیل پایتختی اوله راق اعلان ایتیشی و امریکا ایلچی لیگی نینگ تل ابیب دن بیت المقدس گه انتقال ایتتیریلیشی گه تیگیشلی قراری نی معلوم قیلیشی آرتیدن, اوشبو تشکیلات نینگ حاضرگی دور باشلیغی بولگن ترکیه نینگ دعوتی گه بناً بولیب اوتماقده. 

ترکیه جمهوریتی جمهوررئیسی رجب طیب اردوغان, خودی منه شوو ییغیلیش جریانیده قیلگن معروضه سیده, "بوگون مقدس اسلام دینی نینگ ایلک قبله سی و الاقصی شهریدن عبارت بولمیش بیت المقدسی میز نینگ موقفی گه قیلینگن تجاوز باره سیده بحث ایتیش اوچون ییغیلگن وضعیتده میز" دییه قید ایتدی. 

میلادی 1947 نچی ییلیده گی اسرائیل اشغالیدن بیری, فلسطین نینگ اسرائیل تامانیدن محاصره ایتیلگن لیگی نی بیلدیرگن جمهوررئیسی اردوغان, "اوشبو وضعیت اسرائیل نینگ اشغالچی بیر دولت دن عبارت ایکن لیگی نی کورستماقده.  عینی دمده اسرائیل تروریست بیر دولت دن عبارت. بیت المقدسده اوشبو قدیم شهر نینگ کوچه لریده بیر نیچه دقیقه یوریگن کیشی لر بو جغرافیه نینگ اشغال آستیده ایکن لیگی نی انیق روشده کوره دی" دییه قید ایتدی.

اردوغان, "اوشبو تروریست عسکر لر 10 یاشیده گی باله لرنی اوشلب آلیب قفس نینگ ایچی گه قویه دی.  14 یاشیده گی باله دیبچیک بیلن اوریله دی.  باشقه بیر حادثه ده ایسه آنه سی باله سی نی قوچاقلَیدی.  آنه ایسه دیبچیک بیلن اوریلماقده.  و باله قولیدن آلینماقده.  بو اشغالچی یاکه تروریست بولمه سه نیمه؟ بونی تشریح قیلیش ممکن می؟" دییه قید ایتدی. 

امریکا قوشمه ایالت لری نینگ اوشبو قراری نینگ اعتبار ایگه سی ایمس لیگی نی بیلدیرگن اردوغان, بیرلشگن ملت لر تشکیلاتی خوف سیزلیک کینگشی نینگ 1980 نچی ییلیده گی قراری گه کوره هیچ بیر اولکه نینگ بیت المقدس گه ایلچی لیگی نی آلیب باریشی نینگ ممکن ایمسلیگی نی معلوم قیلدی. 

ترامپ گه عکس العمل کورستگن اردوغان, "مین قیلدیم بولدی دیگن بیر گپ یوق. بو دنیا فقط گینه سیز لر دن عبارت ایمس" دییه قید ایتدی. 

فلسطین نینگ خلق ارا کیلیشوولر گه کیریتیلیشی کیره ک ایکن لیگی نی بیلدیرگن اردوغان, "اسلام اولکه لری اوله راق فلسطین دولتی نینگ انیق روشده نماینده لیک ایتیلیشی خصوصیده کوچلی بیر اراده کورسه تیشی میز کیره ک.  بوگون اوشبو خصوصده تصمیم آلینیشی ضروری.  امریکا قوشمه ایالتلری نینگ زود لیک بیلن اوشبو حقوقی بولمه گن اقدامی دن واز کیچیش گه دعوت ایته میز.  واسطه چیلیک خصوصیتی نی بوتونلی قولدن بیریب قویگن امریکا نینگ اورنی گه, اسلام اولکه لری نینگ دنیا ده تینچ لیک نینگ اورنه تیلیشی خصوصیده مسئولیت آلیشی کیره ک.  بیت المقدس نی فلسطین دولتی نینگ اشغال آستیده گی پایتختی اوله راق تن آلیش گه چقیره من" دییه قید ایتدی. 



علاقه لی ینگی لیکلر