ترکیه نینگ اسرائیل و روسیه بیلن بولگن مناسبت لری

ترکیه جاری هفته ده ایککی مهم قدم تشله دی.  ترکیه نینگ تشله گن اوشبو قدم لری اسرائیل و روسیه بیلن بولگن علاقه لر نینگ عادی له شیشی بیلن علاقه لی آدیم لر دن عبارت ایدی.  اوشبو موضوع ترکیه نینگ تشقی سیاستی و منطقه ده تینچ و برقرار لیک نینگ اورنه تیلیشی جهتی دن اوته مهم اهمیت گه ایگه.  خودی منه شو ینگی لیک نینگ اوزی فلسطین و سوریه مسئله سی نینگ ییچیلیشی دن تشقری, ترور تشکیلاتلری دن عبارت داعش بیلن پی کا کا گه قرشی کوره ش بوییچه هم مهم بیر موضوع نی تشکیل ایتماقده. 

قریب آلتی ییلدن بیری دوام ایتیب کیلیتگن مذاکره لر نتیجه سیده میلادی ۲۰۱۶ نچی ییلی جون آیی نینگ ۲۹ نچی کونیده ترکیه بیلن اسرائیل آره سیده گی علاقه لر نینگ عادی له شیشی بوییچه بیر کیلیشو گه قول قویلدی. اوشبو کیلیشو نینگ اوزی ترکیه نینگ ایککینچی و اوچینچی شرطیدن عبارت ماوی مرمره یاردم کیمه سی گه قره ته اسرائیل حربی لری نینگ هجومی نتیجه سیده جان بیرگن کیشی لرنینگ عایله لری گه تضمینات توله نیشی و اسرائیل نینگ غزه محاصره سی نینگ اداغگه ییتیشتیریلیشی بوییچه کتته موفقیتدن عبارت بولدی.  میلادی ۲۰۱۳ نچی ییلیده اسرائیل باش وزیری بونیامین ناتانیاهو اوشه دور ده ترکیه جمهوریتی باش وزیری بولگن و حاضرگی کونده ایسه ترکیه جمهوریتی جمهوررئیسی دن عبارت رجب طیب اردوغان گه قونگغراق قیلیب امریکا قوشمه ایالتلری دولت رهبری باراک اوباما نینگ حضوریده اسرائیل حربی لری نینگ ماوی مرمره یاردم کیمه سی گه قره تیلگن هجومی سببلی ترکیه دن کیچیریم سوره گن ایدی.

ترکیه بیلن اسرائیل آره سیده گی علاقه لرنینگ عادی له شیشی بیلن علاقه لی اوشبو کیلیشو ایککی مهم موضوع دن عبارت انقره بیلن تل ابیب آره سیده گی مناسبت لر و غزه ده گی وضعیت گه تیگیشلی ینگی امکانیت لر یره تیب بیردی.  ایککی تامان هم سفیر یوباریش بیلن بیر قطارده اقتصادی و توریستیک علاقه لر نینگ قیته باشدن باشله تیلیشی بوییچه هم اوز ارا کیلیشیب آلدیلر.  شونده ی قیلیب ایککی تامانلمه علاقه لر بوییچه ایریم ینگی لیک لر گه شاهد بولیشی میز ممکن.

عینی دمده اوشبو کیلیشو دایره سیده ترکیه غزه گه بشری یاردم یوباریش امکانیتی گه ایگه بولدی.  شونده ی قیلیب ترکیه دن بیر یاردم کیمه سی هیت بیرمی کون لریده غزه لیک لر گه یاردم آلیب باریش اوچون اسرائیل نینگ آشدود بندری تامان حرکت قیلدی. 

بوندن تشقری ترکیه اوشبو کیلیشو دایره سیده غزه خلقی نینگ حیات ستندرت لری نینگ یخشی لشتیریلیشی امکانیتی گه هم ایگه بوله دی.  حیات ستندرت لری نینگ یخشی لشتیریلیشی فعالیت لری کونده لیک غزه خلقی گه بیریلیتگن برق و سو نینگ آرتریلیشی بیلن باشلیدی.  برق و سو نینگ کمچیلیگی غزه خلقی نینگ حیاتی گه منفی تاثیر قالدیرگن اینگ مهم فکتور لر دن بیری نی تشکیل ایتماقده ایدی.  غزه گه برق و سو بیلن علاقه لی زیربنا امکانیت لری نینگ مطالعه ایتیلیشی اوچون زود لیک بیلن فنی بیر تیم یوباریله دی. عینی دمده ترکیه غزه ده بیر کسلخانه نینگ قوریلیشی و غزه ده گی سونگگی حمله لر نتیجه سیده اوی لری ویران بولیب قالگن کیشی لرگه اوی تامین ایتیلیب بیریلیشی سنگری پروژه لری نی هم تکمیل قیله دی. 

غزه خلقی نینگ ترکیه بیلن اسرائیل آره سیده امضالنگن اوشبو کیلیشو نینگ مثبت نتیجه لری نی کوریشی نی آرزو ایتماقده میز.  ترکیه بونده ی بولیشی نی آرزو ایترایکن, اسرائیل تامانی هم اوشبو موضوع نینگ اهمیتی نی درک ایتگن وضعیتده. باشقه بیر تاماندن ایسه, ترکیه اشغال نینگ اداغگه ییتیب فلسطین لیک لرنینگ مستقل بیر دولت گه ایگه بولیش حقیدن دفاع ایتیش گه دوام ایته دی.  خودی منه شو اشغال نینگ اوزی منطقه ده گی اوروش لرنینگ اساسی سببی نی تشکیل ایتماقده.  عینی دمده ترکیه, برچه فلسطین لیک تامان لر بیلن ارتباط قوریش و غربی نوار و غزه ده گی همه فلسطین لیک لر بیلن همکارلیک ایتیش گه دوام ایته دی. اسرائیل بیلن بولگن مناسبت لری نینگ عادی له شیشی بیلن ترکیه نینگ منطقه ده تینچ لیک نینگ تامین ایتیلیشی بوییچه رول اوینیدیگن لیگی کورینماقده. 

جاری هفته ده یوز بیرگن باشقه بیر مهم ینگی لیک ایسه ترکیه نینگ روسیه بیلن مناسبت لری نینگ عادی لشگن لیگیدن عبارت.  ایریم کیشی لرنینگ کوتیلمه گن بیر ینگی لیک اوله راق بهالنترگن لیک لری گه قره مسدن, میلادی ۲۰۱۵ نچی ییلی نوامبر آییده ترکیه نینگ روسیه گه عاید بیر فروند اوروش طیاره سی نی اوریب توشیریشی آرتیدن ترکیه بیلن روسیه آره سیده باشلب کیتگن بحران نینگ ییچیلیشی اوچون بیر نیچه آیدن بیری فعالیت لر دوام ایتماقده ایدی.  اوشبو تشبث لر نتیجه بیردی و ترکیه جمهوریتی جمهوررئیسی رجب طیب اردوغان روسیه لیک تینگداشی ولادیمیر پوتین گه بیر مکتوب یوباردی.  اوشبو مکتوبده جمهوررئیسی اردوغان, روسیه لیک پیلوت نینگ جان بیرگن لیگی اوچون خفه بولگن لیگی نی بیلدیردی.  شونده ی قیلیب ایککی رهبر منطقه نینگ اینگ اساسی ایککی اولکه سیدن عبارت ترکیه بیلن روسیه آره سیده گی مناسبت لرنینگ یخشی لشتیریلیشی اوچون مهم بیر قدم تشله دی.

روسیه اوروش طیاره سی نینگ اوریب توشیریلیشی آرتیدن ترکیه معقول بیر سیاست آلیب باردی.  شونده ی قیلیب روسیه جمهوررئیسی ترکیه گه قره تیلگن برچه اقتصادی و توریستیک تحریم لر نی بیکار قیلیب اوشبو معقول سیاست گه مثبت جواب قیترگن بولدی.  خودی منه شو مثبت ینگی لیک نینگ اوزی ایسه ایککی اولکه خلق لری تامانیدن کتته قیزیقیش بیلن کوتیب آلیندی. 

بوندن تشقری ترکیه بیلن روسیه آره سیده گی مناسبت لرنینگ عادی له شیشی سوریه ده گی اوروش و تروریزم گه قرشی کوره ش بوییچه هم ایجابی بیر اهمیت گه ایگه. جون آیی نینگ ۲۹ کونیده بولیب اوتگن تلفنی صحبت لری جریانیده اردوغان بیلن پوتین اوشبو خصوصلرده بیر یقه دن باش چیقریش بوییچه اوز ارا کیلیشیب آلرایکن, اوز تیم لری گه خودی منه شو باره ده فعالیت آلیب باریش بویروغی نی بیردی.  اوشبو موضوع نینگ تینچ لیک نینگ تامین ایتیلمیتگن سوریه ده وضعیت نینگ یخشی له شیشی و  بیرلشگن ملت لر تشکیلاتی ایتکچی لیگی ده گی ویانا و ژنیو پروژه سی نینگ مهم بیر بولگی دن عبارت بولگن سیاسی بیر اوتیش نینگ تامین ایتیلیشی بوییچه هم کتته رول گه ایگه بوله دیگن لیگی کورینماقده.  ترکیه نینگ سوریه و بشار الاسد نینگ کیله جگی بیلن علاقه لی سیاست لری انیق.  ترکیه بیلن روسیه  آره سیده گی اوز ارا همکارلیک سوریه مسئله سی نینگ ییچیلیشی گه کتته حصه قوشه دی.  عینی دمده اوشبو موضوع نینگ اوزی سوریه دن قره تیلگن داعش تروریزمی گه قرشی ترکیه نینگ موثر بیر شکلده کوره شی توغری سیده هم مفید واقع بوله دی. 

ترکیه نینگ روسیه و اسرائیل بیلن کیلیشیب آلیشی آرتیدن استانبولده گی اتاترک قونلغه سی که تروریستیک هجوم اویوشتیریلگن لیگی تصادفی بیر ینگی لیکدن عبارت ایمس ایدی البته که.  ترور تشکیلاتی داعش اوشبو ایککی کیلیشو گه هم مخالف ایکن, ترکیه نی ستراتیژیک بیر هدفی اوله راق تنله گن وضعیتده.  ترکیه ایسه امریکا قوشمه ایالت لری و روسیه و حتی کیره ک بولگن تقدیرده اسرائیل بیلن همکارلیکده اوشبو ترور تشکیلاتی گه قرشی اوز کوره شی نی دوام ایتتیره دی.

اورته شرق و جهانده گی وضعیت گه قره گنده ترکیه نینگ اسرائیل و روسیه بیلن بولگن مناسبت لری نینگ توزه تیلیشی بیلن علاقه لی اوشبو اقدامی منطقه ده اوز ارا همکارلیک, تینچ لیک و امنیت نینگ تامین ایتیلیشی اوچون جوده هم مهم بیر حرکت نی تشکیل ایتماقده.