سوریه ده سوچی جریانی و S300 لرنینگ جایلشتیریلیشی

تحلیل و تیکشیروو 42

سوریه ده سوچی جریانی و S300 لرنینگ جایلشتیریلیشی

سوریه ده سوچی جریانی و S300 لرنینگ جایلشتیریلیشی

سوریه ده اوتگن دورلرده انچه ینگی لیکلر یوز بیردی. بشارالاسد تیزیمی نینگ روسیه و ایران همکارلیگی بیلن ادلب گه قره ته احتمالی هجومی تورکیه نینگ قاطعانه حرکتی آرقه لی مانع بولیندی و سوچی جلسه سیده تورکیه و روسیه اورته سیده کیلیشووگه قول قوییلدی. سوچی کیلیشووی 3 میلیوندن آرتیق تینچ اهالی حیات کیچیریب تورگن ادلب نی احتمالی بیر هجوم و بشری بحراندن نجات بیررکن روس و تورک تامانلریگه هم بیر قطار مسؤلیتلر تشله دی. کیلیشووگه قرارلشتیریلگن لرگه کوره، 15-20 کیلومتر مصافه ده قورالسیزلشتیریلگن منطقه ایجاد ایتیله دی. M4-M5 یوللر تجارت – ترانسپورت اوچون آچیله دی. تورک و روس عسکرلری جببه خطی نینگ ایککی تامانی گه گزمه قیله دی. تورک و روس ایهالری ادلب نینگ اوستی گه تیکشیروو فعالیتلری عملگه آشیره دی. باشقه بیر مهم حادثه ایسه روس IL-20 اوچاغی نینگ اسرائیل هوایی هجوملری جریانیده سهواً بشارالاسد تیزیمی نینگ هوا مدافعه سیستم لری تامانیدن اوروب توشیرگن لیگی ایدی.

روسیه اوچاق حادثه سیدن اسرائیل نی مسؤل دیب کوررکن، اسرائیل بشارالاسد تیزیمی نینگ ایش بیلمه گن لیگینی مسؤل دیب کوردی. یوز بیرگن حادثه گه عکس المل اوله راق روسیه بشارالاسد S-300 هوا مدافعه تیزیملرینی تسلیم بیردی.

سیاست، اقتصاد و جمعیت تدقیقات بنیادی یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایته میز.

تورکيه و روسیه اورته‌سیده کیلیشیب آلینگن سوچی کیلیشووی نینگ ادلبده یولگه قوییلیشی خصوصیده تورکيه و روسیه‌ نینگ جوابگرچیلیگی کتّه‌. اونی یولگه قوییش مسأله‌سی تورکيه جهتیدن بعضی خوف و قیینچیلیکلرنی اوز ایچیگه آلماقده. اولردن اینگ مهمی ادلبده‌گی رادیکال تشکیلاتلردیر. شو نینگ اوچون هم هیئت تحریر الشام کبی رادیکال تشکیلاتلرنینگ سوچی کیلیشیویده قید ایتیلگنیدیک قورالسیزلشتیریلگن منطقه‌دن یوق قیلینیشی شرط. بو نینگ اوچون تورکيه بیر تاماندن کیره‌کلی فعالیتلرنی عملگه آشیرر ایکن ایکّینچی تاماندن ایسه اوزینی قوللب-قوّتله‌گن سوريه مخالفتی اوستیدن کیره‌کلی فشارنی ایجاد ایتیشی کیره ک. 

سوچی کیلیشوویگه کوره‌ سوريه‌لیک مخالفت گروه قورالسیزلشتیریلگن حدوددن آغیر قوراللرینی ادلب نینگ ایچکی قِسملریگه آلیشی کیره‌ک ایدی. نتیجه‌ده تورک رسميلری نینگ تشبثی بیلن سوريه مخالفتی جبهه گذرگاهیدن تانک، راکت، هاوان و توپلرینی ادلب نینگ ایچکی قِسملریگه آلگن ایدی. لیکن هر احتمالگه قرشی تشکیل ایتیلگن مدافعه‌ گذگاه‌لریده‌گی حربي موجودیتلری دوام ایتماقده. شونینگدیک ضد تانک راکت‌لر، یینگیل و اورته‌ منزللی قوراللر بیلن بیرگه‌ 23-mm و 57-mm قوراللری هم قورالسیزلشتیریلگن حدودده موجود‌دیر. بو وضعیتده قورالسیزلشتیریلگن حدود نینگ اصلیده آغیر قوراللردن تازه‌لنگنلیگینی ایتیش ممکن.

 

روسیه و تورکيه آره‌سیده قول قوییلگن سوچی کیلیشووی آرتیدن ادلبگه قرشی اویوشتیریلگن هوا هجوملری توخته‌دی و تینچ اهالی نینگ کونده‌لیک حیاتی تکرار باشله‌دی. اینیقسه‌ محلي منبعه‌لرده قید ایتیلیشیگه قره‌گنده‌‌ سوريه‌ نینگ همه ولایتیدن کوچگن قریب 60 مینگ اهالی تکرار اوز اوی-جایلریگه قَیته باشله‌گن. تورکيه‌ نینگ دیپلوماسیده‌گی کتّه‌ موفقیتی آرقه‌لی 3 میلیوندن آرتیق انسان نینگ جان و مال-ملکلری سقله نیب قالدی. تورکيه، انسانلیک اوچون کتّه‌ یوتوققه ایریشدی. 

کیینگی موضوعگه اوته‌دیگن بولسه‌ک، روسیه اوچاغی نینگ قوله‌شی آرتیدن روسیه‌لیک رسميلر اسرائیلنی کیسکین قاره‌له گن حالده کوپ اوتمه‌ی مسکو تامانیدن ینه-ده‌ معتدل بیاناتلر بیریلدی. اسرائیل و روسیه اورته‌سیده‌گی معما بحرانگه ایلنمسه‌ هم روسیه بشار الاسد رژیمیگه S-300 هوا مدافعه‌ تیزیملرینی تاپشیریش آرقه‌لی اسرائیل نینگ سوريه هوا ساحه‌سیده‌گی میدانینی تاره‌یتیردی. اسرائیل انچه‌دن بیری سوريه هوا ساحه‌سیدن فایده‌لنگن حالده سوريه‌ده‌گی ایران و حزب الله نینگ موجودیتی گه قرشی هوا هجومی اویوشتیره‌یاتگن ایدی. روس هوا مدافعه‌ تیزیملری نینگ هیچ قچان اسرائیل اوچاقلریگه قرشی هجوم قیلمسلیگی و تیزیم نینگ هوا مدافعه‌ تیزیملری نینگ کملیگی اسرائیل نینگ اوز عملیاتلرینی بی‌ملال عملگه آشیریشیگه امکان یره‌ته‌یاتگن ایدی. 

 

روسیه‌ نینگ بشار الاسد رژیمیگه S-300 هوا مدافعه‌ تیزیملرینی تاپشیریشی فقط‌گینه اسرائیل نینگ هوا هجومی اویوشتیریش کوچینی ضعیفله‌تگندیک کورینسه هم اصلیده اونینگ باشقه‌ تأثیرلرینی هم کوریش ممکن. کیله‌جکده‌گی واقعه‌لر نینگ دوام ایتیشیگه کوره‌ اسد رژیمی S-300 تیزیملری آرقه‌لی هم امریکا قوشمه ایالتلری باشچی لیگیده‌گی خلق‌ارا ائتلافگه قرشی، هم ده تورک هوا کوچلریگه قرشی آلدینگه قره‌گنده‌‌ ینه-ده‌ کوچلیراق دیسه‌ک مبالغه‌ بولمه‌یدی. رژیم نینگ بو وضعیتی فقط‌گینه اسرائیلنی ایمس عینِ وقتده سوريه هوا ساحه‌سیدن فایده‌لنگن برچه‌ تامانگه تأثیر قیلیش صلاحیتیگه ایگه‌.

سیاست، اقتصاد و جمعیت تدقیقات بنیادی یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایتدیک.



علاقه لی ینگی لیکلر